ក្រសួងដាក់ចេញចំណាត់ការតឹងរឹង បន្ទាប់ពីមើលឃើញថារថយន្តដឹកដីដឹកខ្សាច់នៅតែបង្កបញ្ហា
11-August-2016 | ដោយ មែន កំសត់
ភ្នំពេញ ៖ ក្រសួងសាធារណការនិងដឹកជញ្ជូននិង ក្រសួងរ៉ែនិងថាមពល រួមនឹងនគរបាលចរាចរណ៍ផ្លូវគោក បានរួមគ្នាដាក់ចេញវិធានការថ្មី ជាមួយនឹងការអនុវត្តន៍ច្បាប់ឲ្យតឹងរឹងជាងសព្វមួយដង ដើម្បីជំរុញឲ្យក្រុមហ៊ុនដឹកជញ្ជូន រួមទាំងរថយន្តដឹកដី ដឹកខ្សាច់ គោរពច្បាប់ចរាចរណ៍ និងច្បាប់ដឹកជញ្ជូននៅកម្ពុជា ជាពិសេសកុំឲ្យរថយន្តដឹកដី ដឹកខ្សាច់បង្ហុយដី បង្ហូខ្សាច់តាមផ្លូវសាធារណៈបំផ្លាញសោភ័ណភាពទីក្រុងនិងធ្វើឲ្យប៉ះពាល់ដល់អ្នកដំណើរ។
បន្ទាប់ពីការបើកកិច្ចប្រជុំពិភាក្សារួមគ្នាដឹកនាំដោយទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនអស់ជាច្រើនម៉ោងនៅរសៀលថ្ងៃទី១០ ខែសីហា ឆ្នាំ២០១៦នេះ វិធានការសំខាន់ៗ ចំនួន៣ ត្រូវបានដាក់ចេញ ដោយរំពឹងថា នឹងជំរុញឲ្យក្រុមហ៊ុនដឹកជញ្ជូននិងអ្នករកស៊ីដឹកដី ដឹកខ្សាច់ ដឹកថ្មជាដើម ចូលរួមគោរពច្បាប់ចរាចរណ៍ ច្បាប់ដឹកជញ្ជូន ហើយរថយន្តដឹកដី ដឹកខ្សាច់ ដឹកថ្មនឹងមានការគ្របឲ្យបានត្រឹមត្រូវ មិនបង្ហុយដី បង្ហូខ្សាច់នៅតាមផ្លូវ។
លោកទេសរដ្ឋមន្ត្រីស៊ុន ចាន់ថុល បានថ្លែងប្រាប់ក្រុមអ្នកព័ត៌មានក្រោយបញ្ចប់កិច្ចពិភាក្សាថា វិធានការទាំង៣ដែលក្រសួងបានឯកភាពគ្នាអនុវត្តជាជំហ៊ានដំបូងនេះរួមមាន ការផ្សព្វផ្សាយច្បាប់ចរាចរណ៍ទៅក្រុមហ៊ុន និងអ្នករកស៊ីដឹកជញ្ជូន, មន្ត្រីជញ្ជីងចល័តសហការជាមួយមន្ត្រីនគរបាលឆ្មក់ចូលទៅថ្លឹង និងពិនិត្យទំនិញនៅតាមរថយន្តដឹកជញ្ជូននានា ដោយមិនឲ្យអ្នកដឹកជញ្ជូនដឹងជាមុននោះឡើយ ហើយវិធានការមួយទៀតនោះ ក្រសួងនឹងរៀបចំកែអនុក្រឹត្យ អនុញ្ញាតឲ្យមន្ត្រីនគរបាលអាចទៅឈរជើងជាមួយមន្ត្រីជញ្ជីងអចល័តតាមស្ថានីយជញ្ជីងថ្លឹងនានាដើម្បីឲ្យមន្ត្រីនគរបាលពិនិត្យ និងផាកពិន័យរថយន្តមិនគោរពតាមលក្ខខណ្ឌច្បាប់ចរាចរណ៍ស្របគ្នាតែម្តង។
លោករដ្ឋមន្ត្រីបានពន្យល់លំអិតទៅលើវិធានការទាំង៣នេះថា វិធានការទី១. មន្ត្រីនឹងធ្វើការផ្សព្វផ្សាយ ណែនាំទៅក្រុមហ៊ុនដឹកជញ្ជូនទាំងអស់ លើមាត្រាមួយចំនួនទាក់ទងការដឹកទំនិញសំពោងសំពាយ មានមាត្រា៥៦,៥៧ ច្បាប់ចរាចរណ៍ និងមាត្រា៦៧ លើច្បាប់ផ្លូវថ្នល់ដែលបានចែងច្បាស់ណាស់ថា ជនណាធ្វើឲ្យផ្លូវហ្នឹងវាស្អិត ធ្វើផ្លូវហ្នឹងរអិលត្រូវមានការផាកពិន័យ ហើយណែនាំ និងបញ្ជាក់ឲ្យច្បាស់ពីមាត្រានីមួយៗនៃច្បាប់ចរាចរណ៍ និងច្បាប់ផ្លូវថ្នល់ រួមជាមួយសរាចរណ៍ណែនាំរបស់ក្រសួងរ៉ែ និងថាមពល ក្នុងការដឹកជញ្ជូនធនធានរ៉ែ, វិធានការទី២. ក្រុមជញ្ជីងចល័ត របស់ក្រសួងសាធារណការ និងដឹកជញ្ជូននឹងសហការជាមួយនគរបាលទៅឆ្មក់ទៅហៅឡានមកថ្លឹង ដើម្បីពិនិត្យមើលលើកទម្ងន់កំណត់ ឬអត់? ពេលជាមួយគ្នានោះ ខាងនគរបាល ក៏មើលទៀតថា តើឡានដឹកទំនិញនោះខុសនឹងច្បាប់ចរាចរណ៍អីខ្លះ បើដឹកសំពីងសំពោងខុសនឹងច្បាប់ ក៏ខាងនគរបាលអាចផាកពិន័យបានដែរ ឬយ៉ាងណា, វិធានការទី៣. នៅតាមស្ថានីយជញ្ជីងថ្លឹងអចល័តក៏ដូចជាចល័តថ្ងៃក្រោយយើងអាចដូរអនុក្រឹត្យ ដើម្បីឲ្យមន្ត្រីនគរបាល ដែលចូលរួមសហការជាមួយគណៈកមមការជញ្ជីងនេះ លោកមានភារកិច្ចជាមន្ត្រីនគរបាលចរាចរណ៍ដែលមានសិទ្ធិផាកពិន័យគ្រប់ការល្មើសច្បាប់ចរាចរណ៍ទាំងស្រុងតែម្តង។
ប្រជាជន ជាពិសេសអ្នកក្រុងភ្នំពេញកំពុងរង់ចាំមើលចំណាត់ការរបស់លោកទេសរដ្ឋមន្ត្រីស៊ុន ចាន់ថុលថាតើមានប្រសិទ្ធភាពដែរឬអត់ តិចលោដូចចំណាត់ការរបស់ក្រុងដែលប្រកាសក្តែងៗកន្លងមកតែចំណុចអវិជ្ជមានចេញពីពួករថយន្តដឹកខ្សាច់ដឹកដីនេះនៅតែដដែលដោយសារតែក្រុងកន្លងមកច្រើនតែបញ្ជាទៅអស់លោកខណ្ឌដែលធ្លាប់តែសើមមាត់សើមកពីបណ្តាក្រុមហ៊ុនទាំងនេះ។ម្យ៉ាងពួកក្រុមហ៊ុនបូមខ្សាច់ដឹកដីទាំងនេះច្រើនតែមានខ្នងលោកធំ ចាំមើលលោកទេសរដ្ឋមន្ត្រីធ្វើកើតដែរឬអត់៕
ចំនួនអ្នកទស្សនា
- ថ្ងៃនេះ3731
- ម្សិលមិញ4001
- សប្តាហ៍នេះ22281
- ខែនេះ3731
- ឆ្នាំនេះ341711
- សរុប20784167